გიორგი გახარიამ 19 მაისის არჩევნებთან დაკავშირებული ღონისძიებების შესახებ სპეციალური ბრძანება გამოსცა

საქართველოს შინაგან საქმეთა სამინისტრო შუალედური და რიგგარეშე არჩევნების უსაფრთხო გარემოში ჩატარების უზრუნველსაყოფად უწყების მიერ დაგეგმილი ღონისძიებების შესახებ განცხადებას ავრცელებს.

შსს-ს ინფორმაციით, შინაგან საქმეთა მინისტრმა, გიორგი გახარიამ 19 მაისის შუალედური და რიგგარეშე არჩევნების თავისუფალ, დემოკრატიულ და უსაფრთხო გარემოში ჩატარების უზრუნველსაყოფად სპეციალური ბრძანება გამოსცა.

„აღნიშნული ბრძანების თანახმად, ტერიტორიულ ერთეულებში მოქმედი შესაბამისი სტრუქტურული დანაყოფები, წინასაარჩევნო კამპანიის მიმდინარეობისას და უშუალოდ არჩევნების დღეს, თავიანთ სამოქმედო არეალში, სამართალდარღვევათა პრევენციას და მათზე დროულ რეაგირებას უზრუნველყოფენ.

გარდა ამისა, ბრძანება ყველა პოლიციელს სამსახურებრივი მოვალეობის შესრულებისას პოლიტიკური ნეიტრალიტეტის პრინციპის მკაცრად დაცვას ავალდებულებს.

კიდევ ერთი ღონისძიება, რომელიც შინაგან საქმეთ სამინისტრომ არჩევნების მშვიდ გარემოში ჩატარების უზრუნველსაყოფად უკვე გაატარა, ეს არის მემორანდუმის გაფორმება ცენტრალურ საარჩევნო კომისიასთან.

დოკუმენტს ხელი საქართველოს შინაგან საქმეთა მინისტრმა – გიორგი გახარიამ და ცენტრალური საარჩევნო კომისიის თავმჯდომარემ – თამარ ჟვანიამ მოაწერეს.

მემორანდუმით განისაზღვრა საარჩევნო პერიოდში მხარეთა შორის თანამშრომლობისათვის დამატებითი ფორმები და შესაბამისი სამართლებრივი ჩარჩო.

დოკუმენტი ასევე ითვალისწინებს არჩევნების დღეს ხმის მიცემის პროცესის მშვიდ და თავისუფალ გარემოში ჩატარების უზრუნველსაყოფად მხარეთა თანამშრომლობას, ერთობლივი ღონისძიებებისა და სამუშაო შეხვედრების ორგანიზებას”, – აღნიშნულია შსს-ს ინფორმაციაში.

ფეისბუქის კომენტარები

კომენტარის დატოვება

თქვენი ელფოსტის მისამართი გამოქვეყნებული არ იყო. აუცილებელი ველები მონიშნულია *